ثمانين ولا عشرين !!

بسم الله الرحمن الرحيم ..
والصلاة والسلام على اشرف المرسلين
سيدنا وحبيبنا محمد على افضل الصلاة والتسليم الى يوم الدين ..


بداية ,,

احب اشكر كل من سأل عني خلال فترة غيابي بالمسجات و الايميلات
و حتى حط بصمة من بصماته في هذه المدونه سواء بالرد او حتى بالزياره
مشكورين وماقصرتوا وهذا راح يزيد من حماسي اكثر واكثر باذن الواحد الاحد
ويخليني استمر على هذا المنوال متى ماشاء الرحمن ..


بصراحه ..

محتاره وايد عن شنو اكتب وشلون بعرض موضوعي بعد هالفتره وكنت متردده
يمكن ما احصل قبول منكم بس قلت بتشجع وبكتب .. عن فئتين من الناس 
فئة ال 80 %
وفئة 20 %
راح توضح الرؤيه لما تقرون موضوعي
للعلم اختياري لهالنسب من عندي وان شاء الله اوصلها بشكل مفهوم للجميع ..


الله انعم علينا بوايد من النعم اصلا ما نقدر نعدها من كثر نعم الله علينا ماشاء الله بس في ناس تقدر هذه النعمه وترضى فيها بحلوها ومرها وناس العكس يرفسون النعمه بريولهم وما يرضون بشي ابد ..


خل اقولكم سالفة ثمانيني ..

هذا واحد من الناس الله انعم عليه بالصحه والعافيه والقوه في الجسم وخريج احدى الجامعات ويتكلم بكذا لغة منها الانجليزيه والفرنسيه ويحاول يتكلم اردو بعد ومتوظف بوظيفة حلوه ومريحه قاعد ورا هالمكتب شويه شغل يدخل ويطلع على كيفه لا احد يصارخ عليه ولا شي .. حالته الاجتماعية متزوج وزوجته احلى منها مافيه وعنده عيال واموره كلها ماشيه ساكن بشقه زينه وكل شي بحياته تمام من ربع واهل كل شي زين بس يفكر في بيت العمر يقول ليش ما اسكن في بيت احسن من شقه واوسع على نفسي واهلي قاعد ليل ونهار يفكر بهالبيت شلون احصله شايل هموم الدنيا كلها فوق راسه ومتكدر كل هذا علشان بيت مع انه عنده شقه زينه وساترهم وحلوه المفروض يحمد ربه على هالنعم اللي يمكن توصل ال 80% ليش يا الثمانيني بصراحه ماعندك سالفه هاد ال 80% من النعم وصاب تفكيرك على ال20% احمد ربك وارضى بما هو مكتوب لك احسن لك وابرك ..

بما احنا يبنا سيرة 20% اتكلم عن اخونا العشريني ..

واحد من الناس لا دراسه ولا شي فقير وعلى نياته الاكل بالكاد وين وين يحصله عنده بيت اسمه بيت زين السقف ما يطيح على راسه اهو واهله ولا وظيفه مثل الوظايف اللي يتوظفونها الناس ولا حتى عنده نيه يحلم يطالعهم دايم يصبر اهله ويحمد ربعه يقول دام هالبيت ساترني انا واهلي والله ما ينسى عبده الشكور والفقر مو عيب ابتلاء من الله وانا شاكره وحامده اذكر مره من المرات سمعت في احد القنوات الفضائيه من اصحاب الاسر الفقيره يقول ادور بالزباله اكركم الله العظم بس عشان احطه بالماي لما اطبخه ويتغير طعمه واقول حق عيالي غدانا اليوم مرقة لحم !! مع هذا ما يتشرط ويحمد ربه ليل ونهار وراضي بكتبه ومقتنع ..


فائده ,

الله عز وجل يبتلي عبده بالمرض او بالفقر او بالزوج او بعقوق الابناء
ممكن من مسئول في الدوام او من احد الاصدقاء والجيران او بوفاة احد الاقارب
باي شي كان .. لانه مشتاق لسماع صوتك ايها العبد اكثر الدعاء والاستغفار والصبر
ففي الابتلاء كفاره للذنوب وتذكير بالتوبه وهذه رحمه من رب العالمين لعباده ..
وبالنهايه استشهد بقول رسولنا الكريم عليه افضل الصلاة والتسليم ,,

( ما يزال البلاء بالمؤمن والمؤمنه في نفسه وولده وماله حتى يلقى الله وماعليه من خطيئه ) رواه الترمذي

( إن أراد الله بعبده الخير عجل له العقوبه في الدنيا , واذا اراد الله بعبده الشر أمسك عنه بذنبه حتى يوافي به يوم القيامه ) رواه الترمذي