أمــركـ عــجــيــب !!

للتنويه فقط ..

-=-=-=-=-=-=-

↔ كتبت هذا الموضوع باللهجه العاميه لان بقلبي حجي وايد ...

↔ ذكرت كلمة الانسان للشموليه فالكلام موجه للجنسين آدم وحواء ...

↔ هذا الموضوع ليس موجه لاشخاص معينين وانما مجرد نغزه كبيره لكل الناس اللي اعرفهم واللي ما اعرفهم ...

↔ مجرد نصيحه .. قال الرسول عليه الصلاة والسلام الدين النصيحه , قلنا لمن ؟

قال لله ولكتابه ولرسوله ولأئمة المسلمين وعامتهم .. رواه مسلم ..

انسان امره عجيب يقعد من النوم ويكون حاط المنبه على وقت الدوام علشان يلحق قبل لا يطوفه التوقيع او البصمهاو حتى الكرت وينسى ان يحطه حق وقت صلاة الفير !! ولا يكون كاشخ وطالع ومتزكرت يطلع بره بيركب السياره يشوف الجو بره غبار يتأفف ويتنرفزشنو هالجو البايخ والله امره عجيب مايدري انه مخلوق من التراب وبيته من الترابوالغبار مجرد حبيبات صغيره تكون منتشره بالجو تحلطم وشال الدنيا وقعد !!!

طلع من منطقتهم من يدش الدائري يالله صكته الزحمه الله يكون بالعون وهم يتحلطم ولين شنو هالزحمه من وين طلعوا هالناس ويطقطق بالهرنات ويأذي خلق الله من الصبح كل هذا علشان زحمه مادري شنو راح يصير فيك بيوم الحشر والله امرك عجيب !! يوصل الدوام وركضه على البصمه او الكرت وساعات ما يسلم ويه ويه شفيك مستعيل ياليت تكون بهالسرعه في عمل الخير عجيب انت عجيب !!

يقعد بهالمكتب ويتصفح هالجريده ويشرب هالجويه ويطقطق بالكمبيوتر شوي وبتلفونه شوي ضاع الوقت ويأجل شغله لي باجر ويمكن اللي عقبه يقول مو مشكله محد يسأل وخل ينطرون شوراهم مايدري ان محاسب على هالوقت بالعمل مو حق القرقه والربربه .. !! والاعجب من هذا كله تعرف شصار بالمسلسل الفلاني والممثل العلاني او حتى المغني تزوج وتطلق وحلقته امس اكشن ومو طبيعي الجو حده كان مكهرب هذا زعل وهذا ضحك وهذا انسدح ومتابع اخبارهم زين مازين ويصير فلته زمانه بهالسوالف ياريت لو يحط عالاقل ربع اهتمامه بكتاب الله يمكن حتى المصحف بس يعرف شكله من بره ولا تعلم شكل المصحف من ايام المدرسه !!

عجيب يصير جوه رومانسي وشاعري حاطلي اغنيه من سنه 1000 وحطبه الا الادمي مات وتحلل ولا اللي طالعين هالايام غناوي ودقدقه ويقلب الموجه شوي على السامري وساعات ايقاع حزين اللي يخطر على البال وما يخطر تلقاه بطل وسمع ويكيف وطاير من الوناسه والاندماج ولي صار وقت الاذان تلقاه حتى مايعرف وقت الصلاة وحتى الكلام اللي ينقال بالاذان ما يعرفه وينطر متى استغفر الله يسكت المؤذن علشان يرد حق خباله !! يالله قوم شمر ذراعك توضى وصل يقول ها لا اخاف ستايلي يتغير ساعات هالمكياج والكريمات وماكو شي مو حاطينه بالويه لما ارد البيت احسن والله امره عجيب انا بس بفهم انت ضامن عمرك هالدقيقه علشان تضمنها لي ما توصل البيت !!!

يطالع الساعه باقي وقت خل اكل انقنق شوي عليه بالعافيه :) ويسولف شوي ويتكلم عن لبس فلان وشكله والا شفيه المدير ماد البوز ولا طاعوا شنو لابسه هاذي شيسوي بعد يضيع وقته بس عجيب ما يدري ان كلنا سواسيه وكلنا راح نلبس الكفن الابيض !!! يالله واخيرا صار الوقت انتهى الدوام وناسه بنرد البيت يطلع يقول وويه يا حافظ ليش الجو جذي حار يا غبار يا حر انت شفيك يا اعجب مخلوق عرفته مو عاجبك شي هذا الشمس وحرارتها حرقتك شنو بتسوي بحر جهنم !! الله يبعدها عنا كلنا ..

طبعا كالعاده تحلطم بالشارع على فلان وعلان ويصير نحيس مايخلي فلان يمر ولا يبطون جبدي اللي يمشون على حارة الامان مادري هالخطوتين اللي مشيتها بتخليك توصل اسرع بصراحه استغرب من هالتفكير !! وصل البيت علطول اول شي يفكر فيه البلعه ياكل ويتفخ هالبطن وحتى كلمة شكر لله على هالنعمه ماكو ولا اللي يقهر موعاجبه الاكل نعمة الله اكل واسكت غيرك مو محصل يتمنى فتات خبزه انت شفيك صج ان امرك عجيب !!

المهم عقبها بيقيلل الحبيب بعد خلاص اكل وتخدر وفوقه قلاص لبن يالله خل انام ويينك يالطيب صلاة الفير والظهر اللي قلت بتصليها في البيت ولا دخلنا وقت العصراي صلاة يامعود من باجر ابلش اصلي من الفير شنو هالتهاون مصيبه عوده!!!!! يسحبها نوم ويدخل وقت المغرب سبح ولبس وكشخ وتعطر بروح اتسوق او اتمشى هوب هوب انتي يالغاليه شكو حاطه عطر يبه مايصير عطرج بس بالبيت وللمحارم عمك اصمخ جنك تنفخ بجربه مقضوضه !!

ولا فيه وايد كلام يقرقع بقلبي وللقصه بقيه ,,, :)